Беларускія аграрыі сабралі першы мільён тон збожжа новага ўраджаю. Аб гэтым паведаміў 21 ліпеня міністр сельскай гаспадаркі і харчавання Анатоль Хацько на цырымоніі ўшаноўвання першых у Гомельскай вобласці экіпажаў, якія намалацілі 1 тыс. т збожжа, перадае карэспандэнт БЕЛТА.

Як адзначыў міністр, паводле аператыўных даных, атрыманых 21 ліпеня ад абласцей, у краіне намалочана ўжо звыш 1 млн т збожжа. "Усе рэгіёны ўключыліся ва ўборку. У паўднёвых, напрыклад, у Брэсцкай вобласці абмалочана больш за 30 працэнтаў плошчаў, добрыя тэмпы дэманструе Гомельская вобласць, - сказаў ён. - Першы мільён збожжа паказвае, што тэмпы ўжо набраны, з кожным днём яны павінны нарошчвацца".

Цяпер, падкрэсліў Анатоль Хацько, перад хлебаробамі стаіць задача ўбіраць 5 працэнтаў плошчаў збожжавага палетка ў дзень, пакуль гэтаму спрыяе і надвор'е. Для ўборкі збожжа таксама прыцягнуты сілы з прамысловых прадпрыемстваў, падключаюцца актыўна да ўборачнай кампаніі студэнты профільных ВНУ.

Ураджай у разрэзе абласцей адрозніваецца, таму што вялікі ўплыў аказалі ў гэтым годзе ўмовы надвор'я. Напрыклад, аграрыі Гомельскага рэгіёна актыўна змагаліся з фактарам надвор'я, вялі перасеў культуры на месцы загінулых пасеваў, каб захаваць баланс па кормавытворчасці і кампенсаваць недабор збожжа.

Паводле слоў міністра, сёння ў краіне ўжо дзясяткі экіпажаў камбайнераў перасягнулі рубеж 1 тыс. т намалочанага ўраджаю. "У нас склалася добрая традыцыя ўшаноўваць перадавікоў жніва, і яна павінна захоўвацца", - упэўнены Анатоль Хацько. Ён таксама лічыць, што дасягнутыя камбайнерамі рэзультаты - гэта вынік работы і брыгадзіраў, і аграномаў, і іншых сельскагаспадарчых службаў.

Гаворачы аб мерах падтрымкі хлебаробаў, міністр адзначыў, што распрацаваны палажэнні аплаты працы, карэкціроўкі ў якія ўносяць і вобласці, і гаспадаркі. На яго думку, вельмі важна і маральная падтрымка тых, хто працуе на нівах.

Анатоль Хацько таксама звярнуў увагу, што ў краіне створаны неабходны запас паліва для цяперашняй кампаніі, выдзелены крэдытныя лініі па дзяржзаказе і г.д. Важна на месцах актывізавацца, каб уборку ўраджаю правесці якасна і ў аптымальныя тэрміны, падкрэсліў міністр.

Навіны Беларусі (БЕЛТА)