13 студзеня, Мінск /Кар. БЕЛТА/. Пажылым людзям зімой рэкамендуецца выкарыстоўваць кій, расказаў выконваючы абавязкі загадчыка прыёмнага аддзялення РНПЦ траўматалогіі і артапедыі Андрэй Ярашэвіч, паведамляе БЕЛТА.

"Пажылым людзям рэкамендавана не саромецца хадзіць з кіем, гэта трэці пункт апоры. І ў выпадку падзення з яго дапамогай заўсёды можна намацаць больш-менш устойлівую паверхню, абаперціся", - адзначыў Андрэй Ярашэвіч. Паводле яго слоў, падзенне на вуліцы для пажылога чалавека звязана з шэрагам узроставых фактараў, прычым траўміруюцца такія людзі, як правіла, больш сур'ёзна, чым моладзь. Вялікі працэнт траўмаў звязаны з пашкоджаннем менавіта тазасцегнавых суставаў.

На вуліцы ў пажылога чалавека па магчымасці другая рука, не занятая кіем, павінна быць свабоднай. У гэтым выпадку можна адкінуць руку ў бок, процілеглы падзенню, і тым самым захаваць раўнавагу. "У лепшым выпадку няхай у адной руцэ будзе кій, а ў другой цялежка, у якую чалавек пакладзе ўсё неабходнае і з якой будзе перамяшчацца", - парэкамендаваў медык.

Каб пазбегнуць траўмаў, вельмі важна апранацца згодна з надвор'ем. У зімовы перыяд адзенне не павінна абмяжоўваць рухаў, заўважыў ён. Пераважна насіць абутак з шырокай падэшвай. Важна выбіраць бяспечныя маршруты. Няхай яны будуць у два разы даўжэйшыя, затое ў 10 разоў больш бяспечныя, дадаў Андрэй Ярашэвіч. Асабліва ўважлівымі трэба быць пры выхадзе з пад'езда: на прыступках часта ўтвараецца наледзь.

За 2019 год у агульнай колькасці былі траўміраваны 700 835 чалавек. Прычыны траўмаў у дзяцей размеркаваны наступным чынам: на бытавы траўматызм прыпала 52 працэнты, вулічныя траўмы - 35 працэнтаў, школьныя - 2,7 працэнта, спартыўныя - 6,4 працэнта.

Вядучы навуковы супрацоўнік лабараторыі наступстваў траўмаў і захворванняў пазваночніка і спіннога мозгу РНПЦ траўматалогіі і артапедыі Дзмітрый Цесакоў дадаў, што, нягледзячы на рост колькасці пацярпелых, цяжар траўмаў і ўзровень інвалідызаванасці не ўзраслі. Прырост даных аб дзіцячым траўматызме ён звязаў, у прыватнасці, з актыўным страхаваннем. "Людзі заклапочаны станам здароўя, страхуюць сябе, сваіх дзяцей. І любое пашкоджанне, нават нязначнае, можа быць страхавым выпадкам", - сказаў ён. У цэлым жа сёння насельніцтва стала больш уважліва ставіцца да свайго здароўя, таму людзі часцей звяртаюцца да медыкаў.