Назіральныя камісіі Веткаўскага раёна наведваюць домаўладання грамадзян, якія стаяць на розных відах уліку

У рамках рэспубліканскай акцыі «За бяспеку разам», якая стартавала 12 красавіка, назіральныя камісіі Веткаўскага раёна мэтанакіравана наведваюць домаўладання грамадзян, якія стаяць на розных відах уліку.

На мінулым тыдні камісія зазірнула ў госці да грамадзян, якія лічацца ў спісах як злоўжываюць спіртнымі напоямі. Усяго было праверана больш за 20 домаўладанняў. Работнікі Веткаўскага РАНС і РАУС у чарговы раз правялі з грамадзянамі прафілактычныя гутаркі, прасілі не курыць у жылых памяшканнях і больш уважліва ставіцца да ўласнай бяспекі. Тым больш, што прыкладаў пажараў, якія адбыліся з-за неасцярожнага абыходжання з агнём пры курэнні, толькі ў Веткаўскім раёне ўжо дастаткова. У бягучым годзе на тэрыторыі нашага раёна адбылося 10 пажараў, 4 з якіх з гібеллю людзей. Прычым усе пажары з гібеллю адбыліся менавіта з-за непатушанай цыгарэты.

Акцыя «За бяспеку разам" будзе доўжыцца да 28 красавіка. У рамках акцыі арганізатары плануюць наведаць домаўладання адзінокіх грамадзян, інвалідаў, удзельнікаў Вялікай Айчыннай вайны і шматдзетныя сем'і. Таксама запланаваны шэраг сустрэч з працоўнымі калектывамі раёна.

Аляксей ГОЛУБ.