У Веткаўскім раёне з'явіўся ўнікальны кансультатыўна-адукацыйны цэнтр

Сумесны праект Гомельскага медуніверсітэта і Веткаўскай ЦРБ рэалізаваны на базе амбулаторыі ўрача агульнай практыкі ў аграгарадку Прысна.

Цэнтр павінен наблізіць даступную і якасную меддапамогу да насельніцтва на сяле. Праект таксама дазволіць студэнтам старэйшых курсаў медыцынскіх устаноў адукацыі ўбачыць працу амбулаторыі знутры, азнаёміцца з яе арганізацыйнай структурай, папрактыкавацца аказваць дапамогу пацыентам.

– Мы хочам дапамагчы будучым медыкам прасякнуцца прафесіяй, – адзначыла галоўны ўрач Веткаўскай ЦРБ Крысціна Бондарава. – Таксама новы цэнтр стане важнай часткай у жыцці аграгарадка. Мы зробім усё, каб здароўе і даўгалецце было ў руках сапраўдных адмыслоўцаў.

Прарэктар па лячэбнай рабоце ГомДМУ Уладзімір Пахажай адзначыў, што цэнтр будзе выконваць даручэнні Прэзідэнта па паляпшэнні аказання меддапамогі сельскаму насельніцтву. У час размеркавання многія студэнты паедуць працаваць урачамі агульнай практыкі ў такія амбулаторыі па ўсёй краіне.