"Гэта толькі ўзмоцніць нас". Крупко пра значнасць інтэграцыі з расійскімі рэгіёнамі
Спрадвечныя традыцыі і маральныя прыярытэты дадуць магчымасць развіваць эканамічны патэнцыял рэгіёнаў Беларусі і Расіі, быць моцнымі ўнутры краін і ў сусветнай сістэме. На гэтым зрабіў акцэнт старшыня Гомельскага аблвыканкама Іван Крупко на ўрачыстым сходзе ў гонар Дня яднання народаў Беларусі і Расіі, перадае карэспандэнт БЕЛТА.
Святочны канцэрт і ўрачысты сход праходзяць у Гомельскім грамадска-культурным цэнтры. "Гэта знакавае для народаў Беларусі і Расіі свята. Сёння з намі ў гэты дзень два губернатары - Бранскай і Арлоўскай абласцей. Гэта вельмі сімвалічна. Мы блізкія людзі, у нас агульныя карані. Мы прайшлі ліхалецце вайны, выхаваны на адной ідэалогіі, адных каштоўнасцях", - адзначыў ён.
Народы дзвюх краін звязаны тысячамі моцных ніцей, акцэнтаваў губернатар. З году ў год узмацняюцца міжрэгіянальныя інтэграцыі. Так, заключана 37 дагавораў аб двухбаковым супрацоўніцтве паміж Гомельскай вобласцю і расійскімі рэгіёнамі. Яшчэ 89 пагадненняў рэалізуюцца гарадамі і раёнамі вобласці з адміністрацыйнымі расійскімі ўтварэннямі.
Іван Крупко перакананы: з улікам змяненняў геапалітычнай сітуацыі важна ўмацоўваць фундамент для Саюзнай дзяржавы. "Аснова ўсяго - нашы карані, культура, духоўнасць. Важная задача - з'яднацца цяпер, асабліва ў гэты няпросты перыяд. Думаю, што і духоўнае адраджэнне славянскага свету - аснова далейшага развіцця Саюзнай дзяржавы. А спрадвечныя традыцыі і маральныя прыярытэты дадуць магчымасць развіваць эканамічны патэнцыял нашых краін, быць моцнымі ўнутры краін і ў сусветнай сістэме", - рэзюмаваў ён.
Прывітанні і віншаванні гамяльчанам накіравалі губернатар Бранскай вобласці Аляксандр Багамаз і губернатар Арлоўскай вобласці Андрэй Клычкоў.
Праграму мерапрыемстваў прадаўжае святочны канцэрт з удзелам артыстаў Гомельскай і Бранскай абласцей.