Творы драматургіі са збору князёў Паскевічаў прадстаўлены на выставе ў Гомелі

13 лістапада, Гомель /Кар. БЕЛТА/. Выстава кніг "Увесь свет - тэатр" пачынае сёння працаваць у палацы Румянцавых і Паскевічаў, паведамілі БЕЛТА ў Гомельскім палацава-паркавым ансамблі.

"Выстава паднімае заслону, і на сцэну выходзяць 100 драматургічных твораў, удастоеных гонару ўваходзіць у княжацкую калекцыю", - падкрэслілі ў дзяржаўнай гісторыка-культурнай установе. Тамы могуць пахваліцца значным узростам - самы "стары" з прадстаўленых твораў выдадзены ў 1793 годзе, самы "юны" - у 1911-м. уражваюць і гучныя імёны на вокладках: Мальер, Расін, Калардо, дэ Бамаршэ, Піго-Лебрэн, дэ Мюсэ. Гэта кнігі, з якіх пачынаецца тэатр, і іх проста неабходна ўбачыць, перакананы арганізатары.

У палацы адзначылі: перш чым паўстаць перад публікай ва ўсёй раскошы і бляску акцёрскай ігры, рэжысёрскіх знаходак, сцэнічных дэкарацый, музычнага афармлення, п'еса з'яўляецца на свет у творчых пакутах, вядомых толькі стваральніку. "На гонар творцаў, мукі не былі для іх перашкодай. Менавіта таму свет ведае бліскучыя творы У.Шэкспіра, Г.Ібсена, А.Чэхава і іншых геніяў, якія саўладалі са спецыфікай драматургічнага пісьма. Прытым саўладалі так па-майстэрску, што, нават вырваныя з тэатральных сцен і змешчаныя ў сціплыя кніжныя вокладкі, п'есы займалі ганаровыя месцы на паліцах знатакоў літаратуры. Да такіх можна аднесці і ўладальнікаў гомельскага маёнтка князёў Паскевічаў", - дадалі ў дзяржустанове.