У што гулялі нашы продкі, раскажа выстава ў Гомелі
Выстава "Археалогія аб гульнях і цацках: ад сярэдневякоўя да пачатку XX стагоддзя" адкрылася 14 мая ў Гомелі ў цэнтральнай частцы палаца Румянцавых і Паскевічаў, паведамілі карэспандэнту БЕЛТА ў Гомельскім палацава-паркавым ансамблі.
У экспазіцыі прадставяць дзіцячыя цацкі і інвентар настольных гульняў са збору археалогіі музея, знойдзеныя на тэрыторыі Гомеля, Лоеўскага і Добрушскага раёнаў.
Самы старажытны экспанат - фішка, зробленая са сценкі глінянага збана, канца X - пачатку XI стагоддзяў. Да XIV-XVI стагоддзяў адносяць шахматную фігурку - касцяную разную пешку. Убачаць наведвальнікі і ваўчок для гульні канца XIX - пачатку XX стагоддзяў. Ёсць у калекцыі гліняны абломак твару лялькі таго ж перыяду.
"Вольны час чалавека з самага дзяцінства ва ўсе гістарычныя эпохі суправаджаўся цацкамі і гульнямі. Аб гэтым сведчаць пісьмовыя і іканаграфічныя крыніцы, матэрыялы археалагічных даследаванняў. З артэфактамі розных гістарычных перыядаў і знаёміць выстава", - адзначылі ў дзяржаўнай гісторыка-культурнай установе.
Супрацоўнікі музея плануюць запісаць і размясціць у сацыяльных сетках пасты, якія раскажуць аб асаблівасцях і прымяненні прадстаўленых экспанатаў.
Азнаёміцца з цацкамі продкаў, што дапаўняюць экспазіцыю "Старажытная гісторыя Гомельшчыны", можна будзе да канца лета.-0-