Беларусь і Боснія і Герцагавіна разглядаюць магчымасць абмену вопытам у сферы IT
Беларусь і Боснія і Герцагавіна разглядаюць магчымасць абмену вопытам у сферы IT. Аб гэтым у праграме "Галоўны эфір" тэлеканала "Беларусь 1" заявіў старшыня Прэзідыума Босніі і Герцагавіны Міларад Додзік, паведамляе БЕЛТА.
"Аляксандр Лукашэнка - вялікі лідар, чалавек, побач з якім адчуваецца стабільнасць і бяспека. Мы абмяняліся меркаваннямі аб тым, як мы глядзім на існуючую сітуацыю, якім чынам можа развівацца супрацоўніцтва паміж нашымі краінамі. У прыватнасці, мы гаварылі аб пытаннях фарміравання каманды, якая будзе займацца абменам вопытам у сферы IT і іншых галінах", - сказаў Міларад Додзік.
Ён адзначыў высокі ўзровень арганізацыі II Еўрапейскіх гульняў. "Для мяне вялікі гонар быць тут у час II Еўрапейскіх гульняў. Беларусь арганізуе іх на вельмі высокім узроўні, аб гэтым гавораць усе ўдзельнікі і спартсмены. Еўрапейская грамадскасць убачыць, што ваша краіна можа добра арганізаваць спартыўнае мерапрыемства, што ўдзяляе вялікую ўвагу пытанням бяспекі. Я ўдзячны Беларусі за забеспячэнне такіх умоў", - сказаў старшыня Прэзідыума Босніі і Герцагавіны.
Уразіў Міларада Додзіка і Мінск. "У вас вельмі прыгожая краіна, Мінск - цудоўны горад, усюды ўсё ўпарадкавана, стабільна. Тут нельга ўбачыць тыя падзеі, якія ёсць у многіх краінах. І гэта вашы сумесныя намаганні, намаганні ўлады. Паміж нашымі краінамі існуе разуменне, мы брацкія народы, і я вельмі рады вашым поспехам. Цаню прыгажосць краіны і горада. Вы знаходзіцеся на правільным шляху і робіце крокі ў правільным напрамку", - сказаў на заканчэнне ён.