Беларусь і Куба створаць рабочую групу па пытаннях прамысловасці
Беларусь і Куба створаць рабочую групу па пытаннях прамысловасці. Такая дамоўленасць прагучала на сустрэчы міністра прамысловасці Беларусі Аляксандра Рагожніка з намеснікам прэм'ер-міністра Рэспублікі Куба Рыкарда Кабрысасам Руісам, паведамілі карэспандэнту БЕЛТА ў прэс-службе Міністэрства прамысловасці.
Бакі асноўную ўвагу ўдзялілі пытанням інтэнсіфікацыі супрацоўніцтва ў сферы прамысловасці.
Аляксандр Рагожнік адзначыў гатоўнасць беларускіх машынабудаўнічых прадпрыемстваў прапанаваць кубінскім партнёрам якасную тэхніку: сельскагаспадарчую, камунальную, пасажырскую, грузавую. Сярод напрамкаў супрацоўніцтва - пастаўкі трактаракамплектаў і іх зборка ў Рэспубліцы Куба.
Віцэ-прэм'ер Кубы са свайго боку канстатаваў, што патэнцыял двухбаковага супрацоўніцтва ў гандлёва-эканамічнай сферы задзейнічаны не ў поўнай меры. "Неабходна надаць імпульс і дыверсіфікаваць увесь спектр беларуска-кубінскіх адносін", - падкрэсліў Рыкарда Кабрысас Руіс.
Па выніках перагавораў Аляксандр Рагожнік і Рыкарда Кабрысас Руіс падтрымалі прапанову аб стварэнні рабочай групы па прамысловасці з мэтай распрацоўкі канкрэтных праектаў і напрамкаў узаемадзеяння.