Беларусь падпісала нафтавыя кантракты на 2021 год з шэрагам расійскіх пастаўшчыкоў

28 снежня, Мінск /Кар. БЕЛТА/. Беларусь падпісала ўжо нафтавыя кантракты на 2021 год з шэрагам расійскіх пастаўшчыкоў, заявіў прэм'ер-міністр Раман Галоўчанка ў праграме "Галоўны эфір" на тэлеканале "Беларусь 1", паведамляе БЕЛТА.

"Па пастаўках нафты ў Беларусь ідзе працэс падпісання кантрактаў з пастаўшчыкамі. З шэрагам вядомых пастаўшчыкоў падпісаны пагадненні аб пастаўцы нафты трубаправодным транспартам у наступным годзе. З часткай яшчэ ідуць ўзгадненні асобных дробных умоў", - сказаў Раман Галоўчанка.

Кіраўнік урада выказаў упэўненасць, што да канца года "абсалютна ўсе кантракты на пастаўку нафты ў Беларусь будуць падпісаны".

"Гэта традыцыйныя навагоднія пытанні, у бягучым годзе пэўнага напружання няма, абсалютна планава яны вырашаюцца. Мы дамовіліся з урадам Расійскай Федэрацыі аб тым, што не трэба складаць усё "пад ёлачку", - дадаў прэм'ер-міністр.

Што датычыцца аб'ёму перапрацоўкі нафты на беларускіх НПЗ у 2021 годзе, то, паводле слоў Рамана Галоўчанкі, гэта лічба будзе вызначацца эканамічнай мэтазгоднасцю. "Але расійскі бок гатовы нам паставіць максімальны аб'ём. Калі будзе для нас выгадна перапрацоўваць 18 млн т - будзем перапрацоўваць. Гэта будзе залежаць ад сітуацыі на рынку", - растлумачыў ён.