Дзяржстандарт праводзіць конкурс лепшых тавараў Беларусі
Дзяржстандарт прапануе беларусам прагаласаваць за ўдзельнікаў конкурсу "Лепшыя тавары Беларусі", паведамілі БЕЛТА ў прэс-службе ведамства.
Конкурс праводзіцца сярод арганізацый, якія выпускаюць харчовыя і прамысловыя тавары для насельніцтва, вырабы народных промыслаў, прадукцыю вытворча-тэхнічнага прызначэння, а таксама кампаній, якія аказваюць паслугі насельніцтву. Пры падвядзенні вынікаў камісія будзе ўлічваць водзывы спажыўцоў.
Кожны спажывец можа прыняць удзел у галасаванні толькі адзін раз (паўторнае галасаванне ўлічвацца не будзе). Зрабіць гэта можна да 11.00 16 снежня па спасылцы http://quality.gskp.by/Voting/1. Таксама можна накіраваць свае водзывы ў сакратарыят камісіі да 16 снежня ўключна на e-mail: ntc@belgiss.by.
"Конкурс "Лепшыя тавары Беларусі" садзейнічае вызначэнню якасных, бяспечных і канкурэнтаздольных тавараў і паслуг, у тым ліку новых відаў, а таксама іх прасоўванню на ўнутраны і знешні рынкі", - адзначылі ў Дзяржстандарце. Ён аб'яўляецца штогод з 2002 года.
Больш падрабязную інфармацыю можна атрымаць на сайце Дзяржстандарту ў раздзеле "Якасць і дзелавая дасканаласць".