4 лістапада 2020
Новыя будаўнічыя нормы па ахове ад шуму прыняты ў Беларусі
4 лістапада, Мінск /Кар. БЕЛТА/. Новыя будаўнічыя нормы зацверджаны ў Беларусі. Гэта прадугледжана пастановай Міністэрства архітэктуры і будаўніцтва ад 15 верасня 2020 года нумар 54, якая сёння афіцыйна апублікавана на Нацыянальным прававым інтэрнэт-партале, паведамляе БЕЛТА.
Дакументам зацверджаны будаўнічыя нормы "Ахова ад шуму". Яны распрацаваны РУП "Будтэхнорм" і ўнесены галоўным упраўленнем горадабудаўніцтва, праектнай, навукова-тэхнічнай і інавацыйнай палітыкі Мінбудархітэктуры. Нормы будуць уведзены ў дзеянне праз 60 каляндарных дзён пасля іх афіцыйнага апублікавання.
Гэтыя нормы ўстанаўліваюць патрабаванні да акустычнага праектавання будынкаў рознага прызначэння пры планіроўцы і забудове населеных пунктаў для забеспячэння нарматыўных параметраў акустычнага асяроддзя ў вытворчых, жылых, грамадскіх будынках і на тэрыторыі жылой забудовы. Яны таксама ўстанаўліваюць патрабаванні да акустычнага праектавання зальных памяшканняў спецыяльнага прызначэння: залаў музычна-драматычных, драматычных, оперных тэатраў і кінатэатраў, канцэртных і спартыўных залаў, пасажырскіх залаў вакзалаў і аэрапортаў, лекцыйных залаў, залаў нарад і пасяджэнняў, канферэнц-залаў, залаў прэс-канферэнцый і шматмэтавага акустычнага прызначэння. Пры гэтым буднормы не распаўсюджваюцца на акустычнае праектаванне радыё-, тэле-, кінастудый і адкрытых збудаванняў для правядзення спартыўных, культурна-асветных і відовішчных мерапрыемстваў.
З усімі дзеючымі тэхнічнымі нарматыўнымі прававымі актамі ў галіне будаўніцтва, а таксама з праектамі дакументаў у гэтай сферы можна азнаёміцца на афіцыйным сайце Мінбудархітэктуры (www.mas.gov.by) у раздзеле "Будаўнічыя нормы і правілы".