Настройкі
Настройкі шрыфту
Arial
Times New Roman
Памер шрыфту
A
A
A
Міжлітарная адлегласць
Стандартнае
Павялічанае
Вялікае
Колеравая схема
Чорным
па белым
Белым
па чорным
Веткаўскі раённы выканаўчы камітэт
11 лістапада 2019

Прадпрыемстваў з зарплатай ніжэйшай за Br500 у Беларусі да канца года застанецца некалькі дзясяткаў - Мінэканомікі

Прадпрыемстваў з сярэдняй зарплатай меншай за Br500 у Беларусі да канца года застанецца некалькі дзясяткаў. Аб гэтым 10 лістапада заявіў міністр эканомікі Дзмітрый Крутой у эфіры тэлеканала "Беларусь 1", паведамляе БЕЛТА.

Указ нумар 401 "Аб параметрах прагнозу сацыяльна-эканамічнага развіцця Рэспублікі Беларусь на 2020 год" прадугледжвае распрацоўку плана дадатковых мер для росту эканомікі. Паводле слоў міністра, асобная ўвага будзе ўдзелена прадпрыемствам з нізкай зарплатай. Цяпер у Беларусі прыкладна 470 арганізацый, на якіх людзі ў сярэднім атрымліваюць па Br500 і менш. "Да канца года пастаўлена задача максімальна знізіць колькасць такіх прадпрыемстваў, каб іх засталося некалькі дзясяткаў", - адзначыў Дзмітрый Крутой. Па арганізацыях, якія не могуць выплачваць па Br500-600, будуць прымацца сістэмныя рашэнні, падкрэсліў ён.

Акрамя таго, у 2019 годзе ўрад плануе разабрацца з сітуацыяй на прадпрыемствах, дзе зарплата ніжэйшая за Br400. "Іх засталося дзевяць. Да канца года разбяромся поўнасцю", - сказаў міністр.

Дзмітрый Крутой пракаменціраваў некаторыя прагнозныя параметры 2020 года. Так, рост ВУП запланаваны на 2,8 працэнта. У той жа час міжнародныя эксперты лічаць, што гэты паказчык будзе ніжэйшы. Яны, як растлумачыў кіраўнік Мінэканомікі, бяруць самыя негатыўныя, песімістычныя сцэнарыі, улічваючы, што ў Беларусі на наступны год пакуль няма дамоўленасцей з Расіяй наконт цаны на газ і пытання кампенсацыі страт ад падатковага манеўру.

Міністр нагадаў, што на мінулым тыдні ў краіне працавала місія МВФ. Бакі абмяняліся данымі аб параметрах грашова-крэдытнай, фінансавай сферы, макраэканамічных паказчыках. "Думаю, у іх будзе ў бліжэйшы час апублікавана больш узважаная ацэнка адносна росту нашай эканомікі", - лічыць Дзмітрый Крутой.

Экспарт Беларусі ў наступным годзе павінен павялічыцца на 3,6 працэнта. Апераджальнымі тэмпамі будзе ён расці ў частцы паслуг. У ліку лідараў застанецца IT-сектар. Тэмп росту экспарту інфармацыйных паслуг запланаваны на ўзроўні 110-112 працэнтаў. На другім месцы транспарт - 104-105 працэнтаў. Вялікі экспартны патэнцыял маюць адукацыя, ахова здароўя, фінансавы сектар, турызм. Цяпер з улікам гэтага распрацоўваюцца праграмы іх развіцця.

Навіны Беларусі (БЕЛТА)