У Беларусі зацверджаны пералік міжнародных спаборніцтваў на 2021 год

5 студзеня, Мінск /Кар. БЕЛТА/. Урад зацвердзіў пералік міжнародных спаборніцтваў, праводзімых у Беларусі ў 2021 годзе. Гэта прадугледжана пастановай Савета Міністраў ад 30 снежня 2020 года нумар 791, якая сёння афіцыйна апублікавана на Нацыянальным прававым інтэрнэт-партале, паведамляе БЕЛТА.

Згодна з пералікам, у гэтым годзе ў беларускай сталіцы пройдуць такія мерапрыемствы, як чэмпіянат Еўропы па веласіпедным спорце на трэку (17-21 лютага), адзін з этапаў спаборніцтва Еўрапейскай чырлідарскай лігі (2-4 красавіка), чэмпіянат свету па сучасным пяцібор'і (5-14 чэрвеня) і чэмпіянат свету па лазер-ране (9-14 чэрвеня). На ліпень запланавана правядзенне адкрытага кубка Мінска па снукеры і міжнародных спаборніцтваў па трыятлоне "Чэмпіянат краін Балтыі". Розыгрыш Кубка Беларусі (Кубка Руслана Салея) па хакеі з шайбай сезона-2021/2022 адбудзецца ў ліпені і жніўні.

Таксама ў пералік мерапрыемстваў увайшлі фінал чэмпіянату Еўропы па футболе сярод дзяўчат да 19 гадоў (21 ліпеня - 2 жніўня), чэмпіянат Еўропы па маўнтынбайку (9-15 жніўня), 50-ы міжнародны турнір па барацьбе вольнай на прызы Аляксандра Мядзведзя (14-17 верасня), чэмпіянат свету па класічным паўэрліфтынгу (мужчыны, жанчыны, юніёры, юніёркі, юнакі, дзяўчаты) (23 верасня - 3 кастрычніка) і іншыя спаборніцтвы.

Акрамя таго, згодна з планамі, у беларускай сталіцы пройдуць этап Кубка свету і міжнародныя кваліфікацыйныя спаборніцтвы па выездцы (14-18 красавіка і 13-17 кастрычніка).

Пастанова ўступае ў сілу з 1 студзеня 2021 года.