За выпальванне - 1200 рублёў: на тэрыторыі вобласці ратавальнікі ўжо 40 разоў выязджалі на ўзгаранні травы і кустоўя.

Кожная вясна прыносіць з сабой пагрозу ўзнікнення пажараў з-за спальвання леташняй сухой расліннасці. Многія людзі, асабліва на сельскіх тэрыторыях, звяртаюцца да гэтага метаду, каб падрыхтаваць, на іх думку, глебу да новага сезона пасеваў. Але ж меркаванне памылковае! Пры выпальванні сухой травы парушаецца каранёвая сістэма раслін, ад высокай тэмпературы глеба і расліннасць бяднеюць, знішчаецца ўрадлівы пласт, гінуць карысныя парасткі, казуркі і жывёлы.

- На сённяшні дзень ратавальнікі ўжо 40 разоў выязджалі на ўзгаранні травы і кустоўя на агульнай плошчы звыш 7,5 га на тэрыторыі практычна ўсіх раёнаў нашай вобласці, - кажа старшы інспектар цэнтра бяспекі Гомельскага абласнога ўпраўлення МНС Вераніка Матусевіч. - Такія ўзгаранні негатыўна ўплываюць на глебу, пазбаўляючы яе ўрадлівасці і знішчаючы мікраарганізмы, прыводзяць да разбурэння экасістэм, да сур'ёзных матэрыяльных страт. Агонь можа перайсці ў тарфяныя і лясныя пажары.

Вельмі часта ад палаючай травы загараюцца жылыя дамы і гаспадарчыя пабудовы, людзі атрымліваюць апёкі.

- У пажаранебяспечны перыяд асабліва важна выконваць неабходныя меры засцярогі, - кажа Вераніка Матусевіч, - бо дробны промах можа прывесці да сур'ёзных наступстваў.

Так і адбылося 7 сакавіка ў Чачэрскім раёне: з-за неасцярожнасці 90-гадовы пенсіянер атрымаў тэрмічныя апёкі больш за 20% цела.

Як высветлілася, у вёсцы Валасовічы пенсіянер знаходзіўся на тэрыторыі свайго прыватнага падворка і выкінуў у двары незатушаную цыгарэту.

У выніку на падворку загарэлася сухая расліннасць, пры спробе тушэння травы ў пенсіянера загарэліся штаны і куртка. Сусед, які заўважыў дым на ўчастку, выклікаў работнікаў хуткай медыцынскай дапамогі. Мужчыну шпіталізавалі.

- Хацелася б у чарговы раз нагадаць, што незаконнае выпальванне сухой расліннасці, цягне накладанне штрафу ў памеры ад 10 да 30 базавых велічынь, а за развядзенне вогнішчаў у забароненых месцах можна атрымаць штраф у памеры да 12 базавых велічынь, - дадала Вераніка Матусевіч.

Калі вы хочаце навесці парадак на сваім участку, выберыце прыдатнае месца для спальвання расліннага смецця. Неабходна пераканацца, што месца знаходзіцца на дастатковай адлегласці ад будынкаў, дрэў і іншых гаручых матэрыялаў. Лепш за ўсё выкарыстоўваць спецыяльныя металічныя кантэйнеры для спальвання. Сачыце за працэсам спальвання і кантралюйце агонь. Не пакідайце вогнішча без нагляду і пераканайцеся, што яно цалкам пагашана пасля заканчэння працэсу. Майце пад рукой вядро з вадой ці пяском для тушэння магчымых узгаранняў. Не забывайце ўлічваць умовы надвор'я: не спальвайце смецце ў моцны вецер або сухое гарачае надвор'е, калі верагоднасць распаўсюджвання агню вельмі высокая. Бо гэта можа прывесці да некантралюемага пажару і сур'ёзных наступстваў.

Важна памятаць, што клопат аб навакольным асяроддзі пачынаецца з нас саміх, і кожны з нас можа ўнесці свой уклад у захаванне чысціні і бяспекі нашага асяроддзя.