Напярэдадні сезона збору ягад, грыбоў і іншай дзікарослай прадукцыі інспекцыя Міністэрства па падатках і зборах Рэспублікі Беларусь па Гомельскай вобласці нагадвае.

Рознічны гандаль (рэалізацыя) грыбамі, ягадамі, лекавымі раслінамі, арэхамі і іншымі дарамі прыроды для фізічных асоб, якія не ажыццяўляюць прадпрымальніцкую дзейнасць, не прызнаецца аб'ектам падаткаабкладання адзіным падаткам. Даходы фізічных асоб ад продажу такой дзікарослай прадукцыі вызвалены ад выплаты падаходнага падатку.

Звяртаем увагу! Рэалізацыя фізічнымі асобамі, якія не ажыццяўляюць прадпрымальніцкую дзейнасць, дзікарослай прадукцыі грамадзянам павінна ажыццяўляцца самастойна, г.зн. без прыцягнення іншых фізічных асоб, на гандлёвых месцах на рынках або ў іншых устаноўленых мясцовымі выканаўчымі і распарадчымі органамі месцах.

Таксама вызваляюцца ад выплаты падаходнага падатку даходы, атрыманыя фізічнымі асобамі ад збору і здачы дзікарослай прадукцыі арганізацыям і індывідуальным прадпрымальнікам, якія ажыццяўляюць у парадку, устаноўленым заканадаўствам, дзейнасць па прамысловай нарыхтоўцы (закупцы) названай прадукцыі.

Пры гэтым грамадзянам важна ведаць!

Індывідуальныя прадпрымальнікі пры ажыццяўленні закупкі дзікарослай прадукцыі ў насельніцтва абавязаны афармляць акт закупкі тавараў, сыравіны, матэрыялаў устаноўленай формы, у якім указваецца дата, найменне прадукцыі, колькасць, цана, сума, даныя прадаўца і пакупніка (прозвішча, імя, імя па бацьку індывідуальнага прадпрымальніка і фізічнай асобы, а пры неабходнасці - пашпартныя дадзеныя фізічнай асобы-прадаўца), а таксама подпісы прадаўца і пакупніка.

Арганізацыі закупку ў насельніцтва дзікарослай прадукцыі афармляюць самастойна распрацаваным першасным уліковым дакументам (напрыклад, закупачным актам, ведамасцю на закупку дзікарослых раслін і (або) іх частак у насельніцтва), у якім паказваюцца аналагічныя дадзеныя.